Bai euskarari bai euskarari. zerbitzua eta lana euskaraz Premie Euskara-Planak

| eu | es |

Elhuyarren teknologiek 6 hizkuntzatan itzultzeko, azpititulatzeko, transkribatzeko eta testuak ahots bihurtzeko aukera ematen dute

2024/06/23 sustatu.com -- Albiste originala ikusi

  • Euskara, gaztelania, frantsesa, ingelesa, katalana eta galegoa dira Elhuyarren teknologiek ezagutzen dituzten hizkuntzak.
  • Adimen artifizialean oinarritutako Elia itzultzaile automatikoa, Aditu ahotsa testu bihurtzen duen tresna eta TTS ahotsak gizartearen eskura daude jadanik.
  • Elhuyarren helburua da hizkuntza-teknologien eta adimen artifizialaren esparruan gizartean sortzen ari diren erronkei erantzuten jarraitzea.

Elhuyarren helburua da hizkuntza-teknologien eta adimen artifizialaren esparruan gizartean sortzen ari diren erronkei erantzuten jarraitzea. Bide horretan, eta erraldoi teknologikoei aurre eginez,  aurrerapauso bat eman du, bere teknologia guztiak 6 hizkuntzatan erabiltzeko aukera eskainiz gizarteari. 

Euskara, gaztelania, frantsesa, ingelesa, katalana eta galegoa dira Elhuyarren teknologiek ezagutzen dituzten hizkuntzak. Dagoeneko, beraz, adimen artifizialean oinarritutako Elia itzultzaile automatikoa, Aditu ahotsa testu bihurtzen duten tresna eta TTS ahotsak hizkuntza horietan guztietan erabiltzeko aukera dago.

Elia itzultzaile neuronalaren bidez, testu soilaz gain, dokumentu formatudunak osorik itzul daitezke segundo gutxian, eta sistema edonon txerta daiteke. Horrez gain, itzulpenak pertsonalizatzeko aukera du. Hiztegi pertsonalizatu bat gehitu diezaiokezu, hitz edo esaldi batzuk zuk nahi bezala itzul ditzan beti.

Eliak TTS ahotsak integratuak ditu; ondorioz, testu bat itzultzeko eskatzeaz gain, irakurtzeko ere agindu diezaiokegu. Elia itzultzaileak eskaintzen dituen aukera guztiak ezagutzeko elia.eus webgunean sartzea besterik ez dago. 

Aditu plataformak automatikoki prozesatzen ditu aurrez grabatutako audio- eta bideo-fitxategiak, eta haien transkribapenak eta azpitituluak sortzen ditu. Automatikoki sortutako emaitza hori webgunean bertan editatu dezake erabiltzaileak, horretarako espresuki prestatutako edizio-interfazean. Gainera, Elia Elhuyarren itzultzaile automatikoa integratua duenez, webgunean bertan itzul daitezke transkripzioak eta azpitituluak 6 hizkuntzatara.

Aditu eremu askotan aplika daiteke: ikus-entzunezkoen eta hedabideen sektorean edukia azpititulatzeko, itzultzeko eta edukiari irisgarritasuna emateko; administrazio publikoan, udaletan eta, oro har, bileretan, aktak modu errazean idatziz jasotzeko; industrian, makinen eta pertsonen arteko elkarrekintzak ahots bidez egiteko… Adituk eskaintzen dituen aukera hauek guztiak aditu.eus webgunean ikus daitezke.

TTS neuronala testua ahots bihurtzen duen sistema da. TTS ahots horiek erabiltzeko hainbat aukera daude: ttsneuronala.elhuyar.eus webguneko kutxa erabilita, webguneetan barra irakurlea txertatuta nahiz REST API bidezko integrazioak eginda. Elhuyarren ahots automatikoak, egiazkoak diruditen arren, adimen artifizialean oinarritutako teknologiaren bidez sortutakoak dira. Gainera, Elhuyarrek bere TTS ahots propioak eskuragarri jartzeaz gain, TTS ahots pertsonalizatuak sortzeko aukera ere eskaintzen du. Sei hizkuntzatan erabili ahal izango da, eta, horrela, erabiltzaileek eduki zehatzak zein testu solteak automatikoki ahots bihurtzeko aukera zabalagoa izango dute.  

Adimen artifizialean eta sare neuronaletan oinarritutako itzultzaile automatikoak, ahotsa testu bihurtzen duten tresnak eta ahots automatikoak punta-puntako teknologia erabiltzen dute, etengabe eguneratzen den teknologia. Konfidentzialtasuna eta segurtasuna ere bereziki zaintzen dituzte, eduki guztiak modu konfidentzialean tratatzen baitira.

Orairen eskutik garatu da teknologia

Teknologia hauek guztiak Orai adimen artifizialeko zentroan sortutakoak dira. Orai NLP alorrean (Natural Language Processing) espezializatuta dagoen zentroa da, eta duela bi urte sortu zuen Elhuyarrek, enpresa eta erakundeei goi-mailako ikerketa eta soluzio teknologiko adimendunak eskaintzeko eta industria-ehunaren lehiakortasuna, administrazioen eraginkortasuna eta pertsonen bizitza hobetzeko.

Teknologia horietaz gain, hainbat ikerketa-ildo ditu zabalik Oraik: ingurune zaratatsuetarako hizketaren ezagutza; hizkuntza-eredu neuronal arinak eta industriaren beharretara egokitzen diren zehaztasun handiko hizkuntza-teknologia eskalagarriak, besteak beste. Hizkuntza ugari ditu langai: euskara, gaztelania, frantsesa, ingelesa, katalana, okzitaniera, aragoiera, galegoa…


Iruzkinak:



atez euskara zerbitzua
Artez Euskara Zerbitzua Koop. E.
H: Luzarra, 10 - Deustu Bizkaia Euskal Herria
T: (34) 944 480 000 F: (34) 944 757 229
Kontaktua - Lege jakinarazpena
twitter Facebook
bfa spri Babesleak
XHTML 1.0 Transitional balidoa CSS Balidoa!